Жетібай кен орнында слесарь мен операторларға арналған жаңа үй-жайлар салынды

«ҚазМұнайГаз» ҰК АҚ кәсіпорындарында қызметкерлердің әлеуметтік-тұрмыстық жағдайларын жақсартуға бағытталған Жол картасы аясындағы іс-шаралар жалғасуда.

Биыл Жетібай кен орнындағы («Маңғыстаумұнайгаз» АҚ) түрлі өндірістік нысандарында слесарлық жеті үй-жай, сондай-ақ операторларға арналған модульдік бөлме салынып, пайдалануға берілді.

Слесарьларға арналған әрбір нысан өндірістік және шаруашылық бөлімдерден тұрады. Өндірістік блок көтергіш механизммен, жұмыс үстелдерімен және құралдарды сақтауға арналған шкафтармен жабдықталған, ал қосалқы аумақта киім ауыстыратын бөлмелер, жуынатын және демалыс бөлмелері бар.

Операторларға арналған бөлігі де мамандардың тиімді әрі қауіпсіз жұмыс істеуіне мүмкіндік беретін барлық қажетті еңбек және тұрмыстық жағдайларды қамтамасыз етеді.

Кешендерде су және жылу беретін автономды жүйелер орнатылған. 2026 жылы кен орындарда еңбек ететін жұмысшылардың әлеуметтік-тұрмыстық жағдайын жақсарту жұмыстары жалғасын табады.